Սեպտեմբերի 1-ից աշակերտները դպրոց կգնա՞ն. վարչապետի պարզաբանումը

«Բոլոր սահմանափակումների վերացման տեմպը կախված է այն թվերից, որոնք մենք ամեն օր ստանում ենք, այսինքն՝ վարակի տարածման տեմպից:

Իսկ վարակի տարածման տեմպը կախված է մեզանից յուրաքանչյուրի կողմից հակահամաճարակային կանոնների պահպանման մակարդակից ու որակից:

Հետևաբար պետք է արձանագրել, որ որոշումները ոչ թե կառավարությունն է կայացնում, այլ մենք բոլորս միասին»,-անդրադառնալով հարցին, թե արդյո՞ք սեպտեմբերի 1-ից աշակերտները կհաճախեն դպրոցներ, թե կլինեն սահմանափակումների, հայտարարեց վարչապետ Նիկոլ Փաշինյանը:

«Կառավարությունն ամենաշահագրգռվածն է, որ սահմանափակումներն օր առաջ վերանան ու վերադարձ լինի բնականոն կյանքին:Բայց մենք որոշումը կայացնելիս պետք է համոզված լինենք, որ հետ չենք գլորվելու հուլիսյան իրավիճակների:

Կառավարման պլաններ կան, իսկ թե դրանցից որը կկիրառվի, կախված է թվերից: Ուստի կոչ եմ անում պահպանել հակահամաճարակային կանոնները՝ կրել դիմակ, ախտահանել ձեռքերը, պահպանել սոցիալական հեռավորություն»,-ասաց նա: